建制內部再決裂 葉劉怒炒「女婿」袁彌昌？

　　由反修例運動至今，真係唔知幾多曾經親密嘅關係因為種種原因而決裂，政界當然唔例外。最新一單就關葉劉陣營事喇！話說作為匯賢智庫顧問、又係葉劉愛徒容海恩老公嘅袁彌昌（Derek），要離開匯賢智庫。佢就話同葉劉「和平分手」，不過葉劉就似乎嬲嬲豬，好勞氣咁話Derek都無貢獻，所以先炒咗佢！

「和平分手」定「怒炒」

　　婆媳關係惡搞係人都知，但外母女婿關係都唔易處理啊!容海恩（Eunice）係葉劉愛徒，葉太好多時都當佢係女咁。當日Derek同Eunice拉埋天窗，大家都以為呢位「女婿」喺葉太協助下一定會步步高陞。點知Derek就經常反了反了，發表言論拆建制檔，搞到葉太要出嚟拆彈，都咪話唔頭痕！但話晒「女婿」，再頭痕葉太都只好繼續出面。嗰時無計啦，點都叫「一家人」嘛！

　　之但係反修例呢場風暴，似乎成為咗最後一根稻草。Derek好坦白咁講，辭職某程度因為修例嘅立場問題，佢話8月初向葉太請辭，9月底就正式離職。Derek話立場唔同，唔想令佢葉太尷尬，又話在研究上和政治上已經「無乜嘢幫到葉太」係「和平分手」。

　　不過「和平分手」可能係Derek一廂情願咗啲喇！葉太講起單野就「扯火」，話係佢炒Derek魷魚至真！仲力數三宗罪「無貢獻」、「幫唔到手」、「成日唔返工」，仲叫Derek唔好走咗就「唱衰」人。葉太仲話智庫冇人因政見而離開。

Derek話中有話  Eunice：唔講政治

　　消息一出，好多人就估係咪其實葉太難相處，先至令到佢身邊唔少才俊先後出走？話晒再見亦是「家人」，Derek下晝就喺FACEBOOK出左個PO話：「其實阿太平時對我哋好好嘅，係個好上司嚟，不過佢又真係好有性格，可能呢排心情唔好啫，唔好怪佢。」咪住！點解Jenny睇落總覺得句句有骨？似乎係說話技巧方面，Derek耳濡目染下已經得到「外母」真傳！

　　Eunice面對「左手又係肉、手背又係肉」嘅情況，一於貫徹「我覺得議會內外都不應該牽涉太多政治」嘅立場，佢話喺屋企唔會講政治，一向亦唔會過問老公工作，政治立場唔同唔會影響家庭關係咁話。

　　其實Jenny就有少少擔心新民黨未來路向，因為葉太都係時候要迎接區選同新一屆立會選舉，如果Eunice忽然想疊埋心水湊BB唔再選，到時葉太70之齡，單靠佢撐住成個黨都唔係辦法，所以點樣物色、再扶植更多有心有魅力又忠心嘅少壯派，絕對係個大挑戰！但願Eunice乖乖地，唔好又講錯嘢或者犯咩大錯啦！